خسران يللي تجمع المال خسران
ما تنفعك دنياك والعمر سبعيين
ولدك مرتاح بها وانت تعبان
عندك عجوز وجامع لك ملايين
تجئ من اعمالك الى البيت زهقان
تبي قدوع وقهوه وشاهي زين
تطلب غداك من الفجر وانت جوعان
قطعه دجاج مثلج ورز بصحين
زوجتك عجوز كالهزيله من الضان
تلج وتخاصم تقل تطلبك دين
تشكي ظهرها والمفاصل وسيقان
والضغط والسكر مع منطق شين
وعيال بنتك عندها تقل فيران
تخرب كما خرب سد مارب شياطين
تكسر فناجيل ودرايش وبيبان
وألذ ما عندك لهم وانت بعدين
قم استعذ بالله من كل شيطان
اظهر وخل البيت وانص الديايين
تلقى صماط وكبسه ولحم خرفان
من راس مالك يخصمونه من الدين
تزوج الابكار ما دمت شبعان
وام العيال في بيتها والبزارين
اغنم وخذ لك بنت بكر على شان
تلقى بساتين ثمرها فتامين
الى اقبلت فزت كل ما جيت تعبان
بعطف ولطف وانبلاج الحجاجين
انسامهن عنبر ومسك وريحان
من جرب الابكار عاف ام خمسين
تمتع بدنياك حيث العمر فان
اكرم عيالك والرحم والمساكين
لابد من يوم تحزم بالاكفان
وتحط في قبر على عمق مترين
ينعم بها الوارث بنات وصبيان
وعيال بنتك يوم الاحزان فرحين

وســــــلامتـــــــــكم