عبداللة
14-05-2003, 02:20 pm
هذي الله يحييكم ويسلمكم ويخليكم لعين ترجيكم قصه زوج وزوجته كانوا
عايشين في قمه الرومانسيه والحب وكانت الزوجه مدرسه وراتبها زين
(مع الإعتذار لجميع الإخوة ممن زوجاتهم مدرسات) .
وهذا الزوج جاء يوم من الايام وهو طفران .. ماهنا زود دراهم الله يخلف
وحصل زوجته توها مستلمه المعاش و هو اللي ينبسط و يوم طلعت من
البيت . نقز للدرج اللي فيه الدراهم .. والقط سبعه الاف ريال فقط لا غير
المهم درت زوجته .. وازعلي واطلعي لبيت اهلها ونادت اخوها وتمردس
ببطنه وماخلى فيه عرق صاحي والله لا يوريكم .. لكن الزوج بعد ماصحى
وصحصح و استصح قال هالقصيده اللي كلها شجن وعاطفه بعد ما هجرته
زوجته بدون عوده اتمنى تنال اعجابكم و لكم تحياتي
لي زوجة حبه يتــل المعــاليق
عرسي عليها العام باول شباطي
من روحته والزاد بالبيت ماذيق
ولا اميز العلم القوي والخراطي
بياض وجهه من بياض الغرانيق
وخدودها ياخوي مثل الطمــاطي
والصدر يزهابه عذاب العشاشيق
والردف زامي فوقة الخصر واطي
ومدرسه مع زين كل التخاليق
وزود على هذا تعـرف الخياطي
وجابت رويتبها وصفـقت تصفيق
تسـعة الاف كلهن بالمــغاطي
وصكت عليه بغرفته بالصناديق
وغطت على صندوقهن بالبساطي
وديتها تشري قدور واباريق
وانا انطلقت للبيت يم الشناطي
واخذت سبعة الاف معهن تلاحيق
وخليت انا الف وخمس معهن افراطي
عرفت وقالت عندك اليوم ماليق
واللة لوتربط برجلي ارباطي
وانا عرفت اني توهقت توهيق
يااللة يارب اتهديـن الصراطي
وقالت لخوها كل شي بتوثيق
وجاني حلال القوم راع النشاطي
ثمن ضربني ضربة تييبس الـريق
وقام وفرشني فرشتة للــسماطي
وقام يتوطاني بليا ترافيق
و! يرجد علي ويمسحن بالبلاطي
وا وجس بصدري عقب ضربه حشاريق
قمت اتنفس عقبها من اباطي
لي تسعة ايام وانا بي تشاهيق
عجزت اسولف كن فيني اصقاطي
براسي صعارير اسواة الزرانيق
ومضارب بالبطن مثل المقاطي
ولا ضاق صدري قمت اجمع طوابيق
و الى توسع قمت اجمع قــواطي
انا احمد اللة بدّل الضوق بالضيق
والهم من راسي نزل للمواطي
المصدر مجموعة بريدية
السديراوي
14-05-2003, 02:38 pm
تسلم اخوي عبدالله على هذي القصيدة المخيفة
والي بتخليني اغير مخططاتي في الزواج
والباب الي يجي منه الريح صكه واستريح
خل اخذ ربة منزل وافتك من التصفيق
وسلامتكم
الصحاف
17-05-2003, 05:54 am
ولا ضاق صدري قمت اجمع طوابيق
و الى توسع قمت اجمع قــواطي
--------------
عبدالله 00 موتني من الضحك خصوصا هذا البيت 00فعلا قصيده اكثر من روعه
عبداللة
17-05-2003, 08:39 am
على فكرة مو كل الزوجات مثل أختنا . فية عدد بسيط مو مثلها أتمنى أن نطيح فية أنا وياك (أحتمال ضعيف )