النهاية : <<< ( ماعمره كتب موضوع منسق والي هذا اوله ينعاف تاليه )
احب اني انزل لكم فيذا اول مشاركة لي عبارة عن موضوع جاد شوي عن ذكرياتي قبل خمسة وعشرين سنة
أيام الخميس والجمعة وخصوصا اذا علمنا ابوي ان حنا بنروح لحرمة في الاجازة الاسبوعية اذا صرنا شاطرين ونسمع الكلام ... علشان نزور جدي وجدتي ونشوف عماني وعماتي ... الخلاصــة :
عند إشراق شمس يوم الأربعاء وتأتي أمي لتطل
علينا في الغرفة التي تجمعني وأخواني الخمسة لتقومنا للمدرسة وتقول لنا بلهجة هادئة يملأ أثمها التثاؤب ولكن في هذا اليوم بالذات نكون مستيقضين وشاترين من زود الفرحة بالروحة لحرمة !!!تشهق أمي مستغربة هذا النشاط وتقول : هاااو !! وش مقحصكم بدري ؟
يرد عليها أخي الأكبر ويقول علشان تجي روحة حرمة بسرعة وجالسين نجمع المصاقيل إستعداداً للروحة يا ماما <<< ماعمره قال الا يمه ( بضم الياااااي والميم ) بس علشان الاسلوب يطلع سنع !!
بعد نهاية الحصة السادسة يجمع أخي قواه ليطلق صرخة الفرحة منادياً لنا بأن ننهج ونطلع بسرعة لننتظر أبي ليأخذنا مباشرة إلى حرمة ..
نتجمع أنا واخواني في السيارة البيجو البكس لتأخذ أمي المقعد الأمامي وفي حضنها أخي الرضيع << ( من عرفت أمي ودائما في حضنها طفل رضيع مايمديها تفرح المسيكينة بأن الولد الصغير ارتفع وارتاحت منه الا وتجيب ثاني ... كانت أمنيتها في الحياة الزوجية انها تركب قدام ويدينها حرة طليقة هههه بس ابوي مايمهلها دايم مشغلها بهالمبزرة هههه )
اخوي الكبير يجلس جنب الدريشة واخوي الثاني في الدريشة الأخرى وأختي مبوبزة في الوسط وانا واخوي الي اصغر مني نجلس في حوض السيارة وكل مالف أبوي بقوة نجلس نفر في هالحوض كن حنا مصاقيل مرمية في بانيو هههههه وكل شوي صامختني القزازة مع جبهتي ومرة تصكني جبهة أخوي واذا ضرب ابوي فرامل بقوة مايردني الا التعشيق ناشب في خشمي !!
المهم .. اذا أقبلنا على حرمة نبدأ بالنشيد المتعارف عليه (( حرمة(ن) تنادي .. هيا يا أولادي )) وبصوت مرتفع وعالي تعبيراً عن فرحتنا بالوصول لهذه المدينة الزاهرة !!!
عند الوصول .. عادة اكون مشخص بلبس رياضة ( أخر حصة في يوم الاربعاء رياضة ) ويجلسون يعيروني العيال بالدافور مما يزيدني إصراراً على تغيير ملابسي وألبس ثوب فيه كبك ( مافيه ولا ولد في حرمة منول يلبس كبكات ههه ) اشخص عليهم وألبس كنادر بدل النعال (( أشخص للبنت الي عاشقها والي أشوفها دااائما في استقبالنا عن بيتهم لان اهلها جيران جدي والباب نطح الباب )) ..
عادة نوصل وتكون مخابي الملابس مليانه بالمصاقيل وأخذ بكلة أختي وأشيل منها الفص والخيوط وأمسك كندرة أمي وأقشع منها أي حديدة والا فص مدور علشان أجمعه وأعطيه بنت الجيران عشيقتي تلعب فيهن دبق مع البنات <<< أبوك يالرومنسية ..
تبدأ رحلتنا مع عماني وعيال حرمة باللعب مصاقيل حيث يحتوي حوش جدي بحفرة نعتبرها الملعب الداخلي او المحلي وفيه حفرة في حميان ( مكان يجي فيه السيل ) والحفرة الي في حميان نعتبرها الملعب الدولي وهي للحريفين ... ( يعني للقشيطين لغير الناطقين بالسديراوي هههههه )
نلعب في الملعب الدولي بحميان واجيب معي اجمل المصاقيل الملونه والمائية وعادة يتمتع عيال القرية بالقوة الجسمانية والعضلية ومنهم طيب الذكر عبيد الحلوان الذي أتعامل معه عادة بسياسة ضبط النفس أثناء اللعب أو المحارش خوفاً على تغير ملامح وجهي إلى غضارة معدن هههه .
نعود لبيت جدي بعد أن أرهقنا من لعب المصاقيل ولعب الكورة ونروح للنادي الفيصلي نلعب تنس طاولة والا فرفيرة !!
نجلس قدام التلفزيون وكل واحد معه علك ننتظر تمثيلية اجنبية أسمها ستيف أوستن ونصف قدام التلفزيون ونمدد رجليننا وتغدي هالسيقان تقل كتكات << سوداء من المشق هههه وبعد أن ينتهي المسلسل الاجنبي ستيف اوستن تجي امي وتحصلنا كلنا نايمين قدام التلفزيون مفتحين هالفناخر ومشنترين الاذان من الحماس .. وتبدأ اميمتي الضعيفة تشيلنا واحد وراء واحد وتحطنا فوق المطرحة وتلحفنا ... وننام في جو هاديء !!!
في الصبح اذا قمنا حصلنا روسنا ناشبة(ن) في المطرحة ولاصق الشعر في العلك ولا يفكنا منه الا قاز أو مقص يجز خصلة من الشعر وتصير شعورنا مثل الفرشة الي طايح(ن) عليها مكوى حار وغادية(ن) سوداء نمشي والتوازن معدوم جهة فيها شعر والأخرى مقصوصة علشان نتخلص من العلك << (( علشان كذا لاتنومون عيالكم وفي أثمهم علك )) ... ونمشي ونترنح نحس جهة ثقيلة وجهة خفيفة ..
بعد هذا المنظر الغريب لروسنا نخرج للشارع ونشاهد الفتيات يلعبن الدبق عند عتبة بيبانهم واتابع عشيقتي بكل أهتمام وأسرق بعض الخواتم والتعليقات واعطيها << أبوووك يالاخلاص والتضحية ..
وفي يوم الجمعة نبدأ في تجهيز عفشنا استعداداً لرحلة العودة للرياض وتكون نفسياتنا محيوسة وكل واحد ماد(ن) بوزة شبرين وأخوي من زين الطبايع اذا صار مبلم والا منرفز تشنتر أذانه علشان كذا يضطر أبوي أنه يفتح الدريشة علشان يطلع اخوي اذنه برى الدريشة توسع لنا في السيارة ههههه وأمي مالها خلق على أخوي الصغير وكل ماصاح علقته في المراية الجانبية تقل قربة ههههه وأنا أجلس متمدد في الحوض واصبعي في خشمي أستعيد الذكريات
. البداية : <<< (( أفلقني اذا أنت ناجح في التعبير
)) وتنتهي رحلة الويك إند في حرمة وعلى فكرة معشوقتي الفتاة بنت الجيران تراها طلعت أختي من الرضاعة هههه لا تجلسون تصجوني هههه !! <<< المخرج عاوز كده هههه قصدي أمي !!
عموما أختصرت لكم صفحتين وخرطت الموضوع لكم بسرعة ما ادري وش ترغبون مواضيع طويلة والا نختصر ؟ أخاف أطول ما احد يرد ولا يقرأ !!!
هذا الموضوع جس نبض أبشوف وش يجوز لكم من مواضيع
وسلامتكم أخوكم القروي <<< أحلف
<< ياشيخ ضف وجهك >> 
أحس أنتس من بنات أول الي كانن يلعبن دبق وتسريحتهن دايم ذيل حصان والي شعرها قصير تحط ذيك الشرايط البيض حقت المدرسة ومشنترة من راسها دنقورين تقل مضرب اتاري <<< قديييم أتاري 
<< مسروقة هالجملة من بعض الناس 
<< تصير كذا ياشييخ 