ياجماعة الخير ..
السلام عليكم ورحمة الله وبركاااته ..
في الحقيقة والواقع لاحظت كما لاحظ غيري من المواطنين كثرة المواضيع المنقولة والمنسوخة والمكررة وهذا مما لايدع مجالا للشك انه بحسن نية وبهدف تحسين البوابة والدريشة بس احيانا الاهداف تطلع تسلل ولا تنحسب
انا لاحظت كما لاحظ غيري من كثير من المواطنين والمقيمين المطلعين والي يناظرون منتدانا
<< شفاحة زي ذي !!!!! ان ردودكم جدا جميلة ومنيرة وتحمل خفة دم غير طبيعية وهذا يدل دلالة على ان كل شخص وشخصة << حسن اسلوبك >> طيب .. كل شاب وشابة 
عنده المقدرة على كتابة مواضيع تحمل نكهة الفاكهة .. قصدي الفكاهة بس (( بس مهوب قطو )) يبيلنا جميعاً عدة نقاط لابد ان أنحن نبداها علشان نكون متمكنين من كتابة مواضيع دسمة يبحث عنها القاصي والداني .. وأقولكم هالشي ومهوب معناها انا ابو العريف لا والله انا اتعلم منكم بس ردودكم فيها نكته طبيعية طالعة من شخصية مرحة أكيييد هالشخصية تقدر تكتب موضوع متكااامل وعلى قدر كبير من المسئولية (( قدر كبير وإلا قدر ضغط 
.. )) ...النقاط الواجب اتخاذها للتدريب على الكتابة الساخرة الخيالية الضاحكة :
اولاً : اختار الهدف من الموضوع واحصر قضية وحدة (( واذا انحصرت ودها للحمام )) << مايقدر يصير جاد أبد(ن) .
ثانياً : حدد مقدمة للدخول للقضية وأختار المفردات العامية او السديراوية الي تجعل اسلوبك ممتع للجميع . ثم اختر الموضوع واجعل خيالك وااااسع ولازم تحش شوي بعض العادات وتبالغ بالوصف شوي (( المخرج عاوز كده
)) ثم اختر نهاية للموضوع تناسب القضية .ثالثاً : لازم تكون جريء بالكتابة وتبعد عنك الرهبة من الفشل... وتقول اخاف مايطلع الموضوع زين .. بالعكس انت أبدأ أول بالكتابة واكتب من خيالك لين تنتهي ثم أعد القراءة واضف بعض الجمل (( الجمل والا التيس
)) وخله عندك يوم او يومين لاتنزله فكر بجمل فيها وصف مضحك والا حش خفيف تقدر تضيفها للموضوع . رابعاً : أكتب وخلك واااثق من قدراتك .. واذا أنتهيت من الكتابة ممكن ترسل موضوعك لعضو تثق فيه وتخليه يقراه ويعدل عليه ويربطه بمفك صلصة ويكون متماسك وسلس وعلشان تستفيد مستقبلا من هالتعديلات .
خامساً : خلك خفيف دم واترك عنك المصالة الي مالها داعي
وخل لكل موضوع قضية بدل ماتكتب وترقينا النصلة بدون فايدة ماندري حنا في المقدمة والا النهاية وماندري وش بتوصل له والا وش تتكلم عنه .. حدد اهدافك وقضيتك وبس لاتشرق بنا ولا تغرب بنا محنب فاضين لك 
سادساً : خلك واااثق من نفسك ولا يهمك أبن أمه
والله كتبت هالموضوع وانا أكثر واااحد فيكم يبيله تعلم وابيكم تضيفون بعد الاشياء الي ممكن تفيد ونرتاااح من المواضيع المكررة والمنقولة وانتم قسمن بالله تقدرون تكتبون احسن منهم وفي ذمتي عندكم ردود مهيب صاحية .
وخروا ابطلع
